Kirol arloan emakumeen eta gizonen arteko berdintasunean aurrera egiteko asmoz, Aiaraldeko Kuadrillak eskualdean emakumeen kirolaren garapena bultzatzeko eta sustatzeko proiektua jarri du abian.
Ekimen honen lehen ekintza gisa, Kuadrillako Lehendakaritzak Aiaraldeko Emakumezkoen Lehen Futbol Txapelketa ospatzea sustatu du, Laudioko Emakumezkoen Altzarrate Kirol Elkartearen laguntzarekin.
Txapelketa irailaren 20an izango da Laudioko Altzarrate zelaian eta goizeko 10:00etan emango zaio hasiera. Lehenengo urte honetan haur- eta kadete- kategorietako jokalari arabarrek parte hartuko dute, honako talde hauetan:
- Altzarrate KE
- Hauskaitz CF
- Aurrera de Vitoria CD
Txapelketa triangeluarra izango da, eta horri esker talde guztiek elkarren aurka jokatu ahal izango dute, giro osasuntsua, adiskidetsua eta jokalarien arteko ikaskuntzan oinarritutakoa sortuz.
Laura Fernández Fernández Aiaraldeko Kuadrillako Kultura, Berdintasun eta Gizarte Ongizate Batzordearen Presidentearen hitzetan, “Aiaraldeko Emakumezkoen Futbol Txapelketa honekin beste urrats bat eman nahi dugu kirolean berdintasunarekin dugun konpromisoan. Helburua da gure eskualdeko kirolari gazteen talentua, dedikazioa eta ahalegina ikusaraztea eta balioestea, aldi berean, bizikidetzarako, adiskidetasunerako eta elkarrekiko ikaskuntzarako espazio bat sortzea”.
Era berean, Kuadrillako presidenteak, Iñigo Pinedo Vadillok, honako hau azaldu du: “Bereziki eskertu nahi diegu txapelketan parte hartu duten klubei — Altzarrate KE, Hauskaitz CF eta Aurrera de Vitoria CD —, baita Altzarrate Kirol Elkarteari ere, antolaketa kudeatzeagatik. Zuen babes eta berotasunik gabe txapelketa hau ez litzateke posible izango. Ziur nago kirol eta berdintasun jardunaldi bat izango dela, Aiaraldean emakumezkoen futbola bultzatzeko mugarri izango dena. ”
Horrenbestez, Aiaraldeko Kuadrillak nabarmendu duenez, txapelketa honen helburua ez da soilik emakumeen kirola ikusaraztea eta balioestea, baizik eta parte hartzen duten udalerrien arteko harremanak estutzea eta kirolean emakumeen eta gizonen arteko berdintasunarekiko konpromisoa indartzea.
Antolakuntzak herritar guztiak gonbidatzen ditu ekitaldira joan eta eskualdeko kirolariei babesa adieraztera, bertako kirolaren esfortzuaren, dedikazioaren eta talentuaren isla baitira.
