Gaur egungo Arabako Lurralde Historikoa, administratiboki, udalaz gaindiko zazpi eskualde-erakundetan antolatuta dago; horiek dira Arabako 7 kuadrillak. Araba kuadrilletan banatu zen XVI. mendean; hala ere, 7 kuadrillen egungo mugaketa 1983koa da. Hasiera batean, hauteskunde-barruti gisa eratu ziren; eta ondoren, Kuadrillak arautzen dituen Foru Arauaren bidez (azaroaren 20ko 63/1989 Foru Araua), “lurralde-mailako toki-erakunde” izatera igaro ziren, Arabako toki-erakundeen egitura bereziaren barruan. Hala, eskumenak eta funtzioak esleitu zitzaizkien.
Kuadrillak Batzar Nagusiekiko eta Foru Aldundiarekiko partaidetza, harreman eta kontsultarako toki-erakunde gisa ezarri ziren, eskualdeko interesak defendatzeko helburuarekin. Era berean, zerbitzu publiko mankomunatuak emateko eta kudeatzeko administrazioak ziren, Arabako udalerri txikien beharrei erantzuteko.
Arabako Lurraldea honako 7 kuadrilla hauetan banatzen da:
- Añanako Kuadrilla.
- Aiarako Kuadrilla.
- Kanpezu-Arabako Mendialdeko Kuadrilla.
- Guardia-Arabako Errioxako Kuadrilla.
- Aguraingo Kuadrilla.
- Gasteizko Kuadrilla (Gasteizko Udalarekin bat dator).
- Gorbeialdeko Kuadrilla.
