Aiaraldeko Kuadrillak Hiri Hondakin Solidoen Kudeaketa arautzen duen Ordenantza berria onartu du. Tresna arauemaile horrek eskualdeko hondakin-bilketa eta tratamendu sistema eguneratu eta indartzen du, indarrean dagoen legedira eta ekonomia zirkularraren printzipioetara egokituz.
Ordenantza berriak eskualdeko araudia 7/2022 Legeari —Ekonomia Zirkular baterako Hondakinei eta Lurzoru Kutsatuei buruzkoa— eta prebentzio, berrerabilpen eta birziklapen arloko Europako zuzentarauei egokitzen die. Amurrio, Artziniega, Aiara, Laudio eta Okondo udalerrietan izango da aplikagarria, eskumen hori Kuadrillaren esku baitago.
Testuak hondakinen gaikako bilketarako esparru bateratua ezartzen du, herritarren, merkataritzen eta jarduera ekonomikoen betebeharrak argi zehaztuz, bai eta eskuragarri dauden bilketa-sistemak ere: edukiontziak, atez atekoa, garbigunea eta tamaina handiko hondakinetarako, etxeko hondakin arriskutsuetarako (minipuntuen bidez), ehunetarako, erabilitako olioetarako, gailu elektriko eta elektronikoetarako edo obra txikietako hondakinetarako berariazko zerbitzuak, besteak beste.
Ordenantzaren helburu nagusien artean daude jatorrian bereizketa handitzea, zerbitzuaren eraginkortasuna hobetzea, isurketa murriztea eta ingurumena zein osasun publikoa babestea. Halaber, sentsibilizazio-, ingurumen-hezkuntza- eta informazio-neurriak indartzen dira, ereduaren arrakastarako funtsezko elementutzat jotzen baitira.
Altzarien eta tamaina handiko hondakinen bilketa: aldez aurreko abisua eta baldintza argiak
Aiaraldeko Kuadrillak bereziki azpimarratu nahi izan du altzarien eta tamaina handiko hondakinen bilketa-zerbitzua behar bezala erabiltzea. Zerbitzu horrek derrigorrezko aldez aurreko abisua eskatzen du, Línea Verde aplikazioaren bidez edo doako 900 101 476 telefono zenbakira deituta. Hondakina bilketa egin aurreko egunean utzi beharko da bide publikoan, 20:00etatik aurrera.
Ordenantzak ezartzen du bilketa-eskaera bakoitzeko gehienez 3 m³-ko bolumena onartzen dela. Hondakinak modu ordenatuan utzi beharko dira, arriskuak eta bide publikoan desordena saihestuz, betiere edukiontzi baten ondoan. Zerbitzuak barne hartzen ditu altzariak, koltxoiak, gailu elektriko eta elektronikoen hondakinak, lotuta edo poltsatan jarritako inausketa-hondarrak (adierazitako gehieneko bolumenaren barruan) eta gehienez 25 kilo inguruko lau zakuko obra-hondakinak.
Bilketa-egunei dagokienez, Laudion astearte eta ostegun guztietan egingo da; Amurrion, ostiral guztietan; Aiaran, hilabeteko lehen eta hirugarren asteazkenetan; Artziniegan, bigarren eta laugarren asteazkenetan; eta Okondon, hilabeteko lehen asteazkenetan. Jaieguna bada, bilketa hurrengo lanegunera aldatuko da.
Edukiontzien erabilera egokia eta zehapen-araubidea
Ordenantzak, halaber, erantzukizunen, zaintzaren eta ikuskapenaren araubidea zehazten du, “kutsatzen duenak ordaintzen du” printzipioan oinarritutako zehapen-araubidea txertatuz. Arau-hauste arinak, larriak eta oso larriak tipifikatzen dira, eta arinen kasuan zehapenak 2.000 euroraino irits daitezke.
Zehapena jaso dezaketen jokabideen artean daude hondakinak gaika bereizi gabe edo baimendu gabeko edukiontzietan uztea, hondakinak bide publikoan abandonatzea, edukiontziak manipulatzea edo hondatzea, edukiontzien erabilera desegokia egitea, papera eta kartoia behar bezala ez uztea edo hildako animaliak espazio publikoetan uztea, besteak beste.
Ordenantza hau onartuta, Aiaraldeko Kuadrillak beste urrats bat eman du udal-hondakinen kudeaketa hobetzeko eta eredu jasangarriago, erantzukideago eta Europako ingurumen-helburuekin lerrokatuago bat eraikitzeko bidean, herritarren eta eskualdeko eragile ekonomikoen inplikazio aktiboa kontuan hartuta. Ordenantza Industria, Trantsizio Energetiko eta Jasangarritasun Sailak emandako dirulaguntzari esker egin da.
