Aiarako Kuadrillak 290.893 €-ko diru-laguntza jaso du, datozen hilabeteetan hainbat proiektu estrategiko burutzeko Ingurumen-arloan. Zenbateko hori Eusko Jaurlaritzako Garapen Ekonomiko, Iraunkortasun eta Ingurumen Sailak emandako laguntzarekin eta Next Euskadi programaren laguntzarekin osatu da; bien helburua da eskualdean ekonomia zirkularra bultzatzea.
Zehazki, 213.053 € Euskadi Next programatik etorriko dira, eta Laudioko Garbigunea hobetzeko eta berritzeko proiekturako eta Laudioko eta Amurrioko sorgailu handietan biohondakinen atez atezko bilketaren zerbitzu zabaldua emateko erabiliko dira. Modu horretan, Aiarako Kuadrilla, bi eskaera onartuta, Euskadin diru-laguntza jasotako 79 proiekturen zerrendan sartu da.
Bestalde, 77.840 € jasoko ditu Eusko Jaurlaritzako Garapen Ekonomiko, Iraunkortasun eta Ingurumen Sailetik, eskualdean garapen iraunkorra sustatzen duten ekintzak garatzeko; hala nola, hondakin organikoen gaikako bilketa, hondakinen bilketa-zerbitzuari buruzko ordenantzak berrikustea, iraunkortasunerako hezkuntza/2030 eskola-agenda eta Asteklimaren esparruan ingurumen-sentsibilizaziorako ekintzak gauzatzea.
Ekarpen ekonomiko horiei esker, Aiarako Kuadrillak lanean jarraituko du iraunkortasunaren eta zirkularitatearen estrategien ildotik, herritarren bizi-kalitatea hobetzen laguntze aldera.
