Aiaraldeko Kuadrillak, udalekin elkarlanean, bi auzo konpostajerako gune berri jarri ditu martxan: bat Arraño auzoan, Laudion, eta beste bat El Soto-Zaldua auzoan, Artziniegan. Gehikuntza horiekin, Kuadrillako auzo konpostajerako sareak sei gune ditu guztira, Amurrio, Aiara, Artziniega eta Laudio udalerrien artean banatuta, hondakin organikoen kudeaketa tokiko eta jasangarrian oinarritutako eredua indartuz.
Udaberrirako eta 2026 amaierara arte, Kuadrillak sare hau zabaltzen jarraitzea aurreikusten du, etxeko konpostaje tailerrak antolatuz eta gune berriak prestatuz batzar administratiboetan eta auzoetan. Zabalpen honi esker, Artziniegak bere bigarren konpostaje komunitarioko gunea izango du, eta Laudioren Arraño auzoak bere lehen gunea estreinatuko du. Ekimen honek auzotarrei beren etxeetan sortutako hondakin organikoak modu komunitarioan kudeatzeko aukera emango die, kontsumo jasangarri eta hurbilagoa sustatuz.
Parte hartzen duten familien hondakin organikoak tokian bertan kudeatuko dira instalatutako konpostagailuen bitartez, langile tekniko espezializatuek jarraipena eta dinamizazioa eginez. Familiak animali edo landare jatorriko hondakin organikoak bakarrik utzi behar dituzte, sukaldatuak izan ala ez, jarraibide sinple batzuk betez, eta haiek bakarrik jasoko dute sortutako konposta.
Aiaraldeko Kuadrillak, gune berrietara hurbil dauden familiei gonbitea luzatzen die atxikimendu eta hasiera-saioetan parte hartzeko: El Soto-Zaldua (Artziniega) otsailaren 19an egingo da, 19:00etan, Artziniegako Udaletxean, eta Arraño (Laudio) otsailaren 27an izango da, 18:00etan, Laudioko Kultur Etxean. Hurrengo egunetan, auzo horietako etxeek informazio-orrialde bat jasoko dute, dagokion saiora gonbidatuz.
Saioetara ezin direnak hurbildu, baina parte hartu nahi dutenek, Aiaraldeko Kuadrillarekin harremanetan jar daitezke zuzenean ingurumena2@aiaraldea.org helbide elektronikora idatzita edo 679 79 19 33 telefonora deituz.
Proiektu honek Eusko Jaurlaritzako Industria, Energia Trantsizio eta Jasangarritasun Sailaren eta Arabako Foru Aldundiaren finantzaketa du.
